विविध दुर्गा मित्र मंडळांच्या भक्तांचा हजारो किलोमीटरचा कठीण प्रवास; मंगळ ग्रह देवाच्या चरणी ज्योत अर्पण करून नवरात्रोत्सवासाठी रवाना
(दिव्यचक्र वृत्तसेवा)
अमळनेर : नवरात्रोत्सवाच्या निमित्ताने देशातील प्रसिद्ध देवीमातेच्या तीर्थक्षेत्रांतून अखंड ज्योत आपल्या गावात आणण्याची भक्तिमय परंपरा जपत विविध दुर्गा मित्र मंडळांचे भक्त दरवर्षी हजारो किलोमीटरचा कठीण प्रवास करतात. या प्रवासादरम्यान अखंड तेवत ठेवलेल्या ज्योती श्री मंगळ ग्रह मंदिर, अमळनेर येथे आणून प्रथम श्री मंगळ ग्रह देवाच्या चरणी अर्पण केल्या जातात. यंदाही विविध मंडळांच्या अखंड दुर्गा ज्योतींचे अमळनेरमध्ये उत्साहात स्वागत करण्यात आले.
जामनेर, उमाळा आणि वाकडी येथील मंडळांचा सहभाग
यामध्ये नवदुर्गा मित्र मंडळ, कापूसवाडी, जामनेर; जय बजरंग ग्रुप, उमाळा, जळगाव; तसेच महाराणा ग्रुप, वाकडी, जामनेर या मंडळांच्या भक्तांचा सहभाग होता. संबंधित मंडळांच्या माहितीनुसार, काही भक्तांनी पावागड, सावरियाशेठ, महाराणा ग्रुप, वाकडी, जामनेर यांनी तनोट माता मंदिर, भारत-पाकिस्तान सीमेलगतच्या परिसरातील देवीस्थानांशी संबंधित मार्गाने ज्योत आणण्याचा संकल्प पूर्ण केला. काही मंडळांच्या भक्तांनी पावागडहून परतीच्या प्रवासात शहादा, नेरी आदी मार्गांवरून आपल्या गावाकडे प्रस्थान केले. यातील महाराणा ग्रुप, वाकडी, जामनेर मंडळाने सुमारे १,२५० किलोमीटरचा प्रवास करत अखंड ज्योत आणली. या प्रवासात भक्तांनी ज्योत अखंड ठेवण्यासाठी विशेष काळजी घेतली. युवक भक्त अनवाणी पायांनी धावत ज्योत घेऊन येत देवीमातेची आराधना करतात. श्रद्धा, निष्ठा आणि सामूहिक सेवाभावाचे दर्शन घडविणारी ही परंपरा अनेक वर्षांपासून सुरू आहे.
राष्ट्रीय स्वयंसेवक संघाकडून स्वागत; आशिष चौधरी यांच्या आरोग्य केंद्रात विश्रांती
अमळनेर शहरात राष्ट्रीय स्वयंसेवक संघाच्या कार्यकर्त्यांकडून या दुर्गाज्योतींचे स्वागत करण्यात आले. त्यानंतर शांतीभूषण ट्रेडर्स, पतंजली वितरक व आरोग्य केंद्र, कचेरी रोड, अमळनेर येथे आशिष भाऊ चौधरी यांच्या वतीने ज्योतींची विधिवत पूजा करण्यात आली. भक्तांना काही वेळ विश्रांती, चहा-नाश्ता आणि प्रसादाची व्यवस्था करण्यात आली. त्यानंतर हे भक्त श्री मंगळ ग्रह मंदिराकडे रवाना झाले.
श्री मंगळ ग्रह मंदिरात विधिवत पूजा आणि अखंड ज्योतींचे दर्शन
श्री मंगळ ग्रह मंदिरात मंगळ ग्रह सेवा संस्थेचे अध्यक्ष श्री. दिगंबर महाले, विविध विश्वस्त आणि मंगळ ग्रह सेवेकरी यांच्या उपस्थितीत या ज्योतींचे सहर्ष स्वागत करण्यात आले. मंदिरात ज्योतींची विधिवत पूजा-अर्चा करण्यात आली. श्री मंगळ ग्रह देवाच्या चरणी ज्योत अर्पण करून देवदर्शन व मंदिर परिसरात प्रदक्षिणा करण्यात आली. त्यानंतर या अखंड ज्योती मंदिर परिसरात रात्रभर ठेवण्यात आल्या. दुसऱ्या दिवशी सकाळी विधिवत पूजा आणि आरती करून पुढील प्रवासासाठी ज्योतींना निरोप देण्यात आला. मंदिराच्या वतीने आलेल्या सर्व भक्तांच्या निवासाची, महाप्रसादाची आणि आवश्यक सेवासुविधांची व्यवस्था करण्यात आली.
हिंदू परंपरा आणि नवरात्र भक्तीचा जागर
या परंपरेनुसार, गावात ज्योत पोहोचल्यानंतर तिचे स्वागत करून नवरात्रोत्सवाच्या काळात नऊ दिवस पूजन केले जाते. अनेक कुटुंबांमध्ये घटस्थापना, देवीपूजन, उपवास आणि अन्य धार्मिक विधी श्रद्धेने केले जातात. अखंड ज्योतीच्या माध्यमातून संपूर्ण गावात भक्तिमय वातावरण निर्माण होते.
अत्यंत कठीण प्रवास करून देवीमातेची अखंड ज्योत आपल्या गावात आणणाऱ्या या मंडळांच्या भक्तांच्या श्रद्धेचे आणि सेवाभावाचे श्री मंगळ ग्रह मंदिराच्या विश्वस्त मंडळाने कौतुक केले. मंदिराच्या वतीने सर्व भक्तांना सेवाभावाने प्रसाद देण्यात आला. श्री मंगळ ग्रह मंदिराकडून दरवर्षी या भक्तांचे स्वागत करून त्यांच्या निवासाची, भोजनाची आणि अन्य आवश्यक व्यवस्थांची काळजी घेतली जाते. धार्मिक परंपरा, परस्पर सहकार्य आणि भक्तिभाव जपणारा हा उपक्रम नवरात्रोत्सवाच्या मंगलमय वातावरणात विशेष महत्त्व प्राप्त करतो.